Nagpasalamat si Sen. Pia Cayetano sa mga kaupod sini nga senador nga nag-unong sa iya matapos ang iya ma-emosyonal nga pahayag sa plenary session sang Senado sang nagligad nga Mierkules, Mayo 20.
Nagpabutyag si Cayetano sang iya pag-apresyar sa mga nagpalapit kag nagsimpatiya sang iya kasubo matapos ang pagpautwas sini sang iya nabatyagan.
Suno sa Senadora, normal lang ang mainit nga diskusyon sa Senado bangud may ara man sila sang nagkalain-lain nga opinyon, apang kinahanglan suno sa iya nga indi dapat pag-ikonsiderar nga normal lamang ang insidente sang lukpanay sa senado kun sa diin nagbilin sa ila sang kakugmat nga mga senador sa majority bloc.
Sa matandaan nga nangin topiko sa bilog nga Pilipinas ang nangin ma-emosyonal nga speech ni Cayetano matapos ang nangin pahayag ni Senator Risa Hontiveros nahanungod sa lukpanay sa Senado sang nagligad nga Mayo 13 sang gab-i.
Ini bangud may pila sa kaupod nila sa senado nga wala gilayon nakapangamusta sa mga miyembro sang majority bloc sang natabo ang insidente.
Samtang, may ara naman sang naglapta nga screenshot sang group chat sang mga senador nga nagapakita nga may pila ka miyembro sang minority bloc nga nagpalab-ot sang mensahe sa ila mga kaupod nga maghalong sa amo nga tinion.
