Nagpangabay ang Office of the Ombudsman sa Sandiganbayan nga magpagwa sang precautionary hold departure order (PHDO) batok kay Senator Rodante Marcoleta, former Anakalusugan party-list Rep. Mike Defensor, kag duha ka iban pa nga mga negosyante.
Ini ang kaangot sa ginrekomendar sang field investigators sang Ombudsman nga pagpasaka sang panumbungon nga plunder kag indirect bribery batok kanday Marcoleta, Defensor, kag mga negosyante nga sanday Joseph Varias Espiritu kag Aristotle Baluyut Viray.
Kasunod ini sang P75 million nga campaign donation sang nagpadalagan si Marcoleta sa 2025 elections.
Sandig sa mga imbestigador, ang gintingob nga campaign donations para kay Marcoleta nga ginapahayag halin sa iya co-respondents ang nagalapaw na sa P50 million threshold para sa plunder.
Sandig sa notice halin sa Sandiganbayan, ginhatag sa Seventh Division ang pagdesisyon sa amo nga request sang Ombudsman. Subong nga adlaw natalana ang hearing.
Ang PHDO amo ang order halin sa korte nga amo ang nagamandu sa Bureau of Immigration (BI) nga balabagan nga makagwa sa pungsod ang isa ka tawo nga ginasuspetsahan nga nakahimo sang krimen nga may minimum penalty nga indi magnubo sa anum ka tuig nga pagkapreso.
Ipagwa ang order kun nakit-an sang korte nga mataas ang tyansa nga malagyo sa Pilipinas ang respondent. Kun may PHDO, wala ini awtomatiko nagakahulugan nga guilty na ang respondent.#
