Target nga magpa-atubang sang 25 tanan ka mga testigo sang House Prosecution Panel sa nagahilapit nga impeachment trial batok kay Vice President Sara Duterte sa Senado.
Suno kay House Lead Prosecutor kag Batangas 2nd District Representative Gerville Luistro, indi pa pwede ipasapubliko subong ang mga pangalan sang mga testigo bangud nagaagi pa sila sa vetting process.
Pahayag ni Luistro nga upod sa mga testigo nga nakalinya amo ang mga opisyal halin sa Department of Education (DepEd) kag Office of the Vice President (OVP).
Apang bangud sa ila malapit nga relasyon sa Bise Presidente, ginapaabot sang panel nga mahimo sila magpabor sa Bise Presidente, gani ipatawag sila bilang “hostile witness” suno sa rules of evidence.
Matandaan nga sa mga nagligad nga clarificatory hearings sang House Committee on Justice, isa sa mga nagtestigo amo si Ramil Madriaga, nga nagpakilala bilang anay aide kag bagman sang Bise Presidente.
Nag-atubang man sa hearing si Anti-Money Laundering Council (AMLC) Executive Director Ronel Buenaventura, nga nagreport nahanungod sa natukiban nga ₱6.7 bilyon nga gina-alegar bank transactions ni VP Sara kag sang iya asawa nga si Atty. Manases Carpio halin tuig 2006 tubtob 2025.
Magluwas diri nagpresenta man sang ebidensya ang mga opisyal sang National Bureau of Investigation (NBI) sa pagpanguna ni Director Melvin Matibag.
Dala sa ginpresentar sini amo ang mga ginpang-usisa nga authenticated videos, acknowledgment receipts, kag iban pa nga detalye nga may kaangtanan sa ginapahayag nga mga pagpamahog sang Bise Presidente.
