Ginapanindugan sa gihapon ni Senator Alan Peter Cayetano nga siya ang legal kag lehitimo nga Senate President sang Republika sang Pilipinas.
Ini ang nangin pahayag ni Cayetano kasunod sang natabo sa Senado kun sa diin nagdeklara sang quorum ang mga senador nga nagtambong sa sesyon kag nagpatigayon sang mga pagbag-o sa liderato kag mga komitiba.
Nagapati ang senador nga wala nagbag-o ang iya posisyon bisan pa nga nagpatigayon sang eleksyon ang bag-o nga mayorya para sa mga opisyal sang Senado.
Dugang pa ni Cayetano, kinahanglan gihapon ang 13 ka boto para sa bisan ano nga pagbag-o sa liderato sang Senado.
Ginakuwestyon man niya ang mga tikang sang iya mga kaupod nga senador.
Nahibaluan nga nadayon ang sesyon kasunod sang pag-abot sang 12 ka mga senador nga nakakompleto sang quorum.
Ang sesyon ginalakipan sang 11 ka mga miyembro sang minority bloc kag ni Senator Francis “Chiz” Escudero, nga nangin sorpresa ang iya pag-abot sa plenaryo.
Gilayon nga ginmosyon ang pagbakante sang tanan nga chairmanships sang mga komitiba sa Senado.
Kasunod sini, ginpili si Sherwin Gatchalian bilang Senate President Pro Tempore, nga nagbulos kay Senator Loren Legarda, kag siya man ang nagdumala sang sesyon bilang Acting Senate President.
Samtang, wala naman nakita bisan landong sang mga senador nga katapo sang nagligad nga majority bloc kun sa diin humalin pa sang nagligad nga Lunes, wala sila nakasulod sa plenaryo para sa mga sesyon sang Senado.
