Masobra isa ka semana halin sang napatay ang duha ka student-athletes sang Ateneo De Manila University, nagpangayo na gid man sang pasaylo ang unibersidad sa ila tagsa ka pamilya kag kaabyanan.
Nanguna sa pagpangayo sang pasaylo si Ateneo President Father Roberto Yap, SJ.
Sa press conference kahapon, Hunyo 15, ginpahayag ni Yap nga nahibaluan sang Ateneo ang sakit nga ginabatyag sang pamilya kag nahangpan nila ang kaakig nga ginabatyag sa unibersidad.
“To the families of Rene and Divine, we see you, we hear you, we acknowledge the unbearable pain of your mourning, we know that the grief you carry right now is compounded by an anger that is entirely natural, justified. On behalf of Ateneo de Manila University, I am here to say simply and directly, we are truly, deeply sorry, we apologize to the families and the entire community for the agonizing pain of this tragedy,” suno kay Yap.
Pahayag pa sini, masakit man para sa ila nga ginsalig sa ila sanday Rene Baterbonia kag Divine Adili apang pareho sila nga wala na nakapauli bangud sa drowning incident sa team building activity sa Aurora sang Lunes, Hunyo 8.
“Two young men entrusted to our care did not return home, and that fact breaks our hearts. No explanation, context, or words can undo that loss. We face this moment with absolute humility, and we ask your prayers and your forgiveness,” dugang sini.
Suno pa sa Ateneo president, wala sang sarang makalaragway sa sakit nga natuga sang trahedya.
“No word in any language is capable of describing this loss. When a young man dies, we mourn the loss of life, the shattering of dreams. We mourn the potential that won’t come true, the empty chairs at family tables and the futures that were supposed to unfold at our playing courts and far beyond them.”
Sa amo man nga press conference kahapon, gin-anunsyo sang Ateneo ang pag-resign ni Thomas Anthony “Tab” Baldwin bilang head coach sang men’s basketball team. Nag-resign man ang team manager nga si Epok Quimpo.
Ginbaton sang unibersidad ang duha ka separado nga resignation.
Nauna na nga ginkumpirma sang Criminal Investigation and Detection Group (CIDG) nga usisaon nila ang possible homicide and anti-hazing violations kasunod sang kamatayon nanday Adili kag Baterbonia.
Subong nga adlaw, Hunyo 16, imbitaron man sang National Bureau of Investigation (NBI) si Baldwin kag ang 20 ka myembro sang Ateneo basketball team lakip na ang coaching staff kag players para sa imbestigasyon.#
