Matapos ang 0-0 draw batok sa reigning European champions nga Spain, nagresulta na naman sa 2-2 draw ang hampang sang Cabo Verde batok sa two-time World Cup winner nga Uruguay.
Si Kevin Pina amo ang una nga naka-goal sa 21st minute nga amo man ang una nga goal sa Cabo Verde sa ila una nga tuig sang pagtapak sa World Cup.
Nagbalos ang Uruguay sang duha ka goals paagi kanday Maxi Araujo kag Agustin Canobbio sa closing minutes sang first half.
Wala nadulaan sang paglaum ang gamay nga island nation kag napatas ang score paagi kay Helio Varela sa ika-61 nga minuto.
Bangud sini nga resulta, tag-dos puntos ang duha ka nasyon samtang padulong na sa final round sang hampang sa Group H.
Nagapang-64 sa ranking ang Cabo Verde kag ini ang second-lowest-ranked team sa 10 ka African representatives sa World Cup subong nga tuig.
Espesyal ini nga matchup kun sa diin personal nga nakalantaw ang iloy sang 40-anyos nga goalkeeper sang Cabo Verde nga si Vozhina. Nangin kaundan sang balita ang iloy ni Vozhina bangud ginbululigan ini sang U.S. State Department, FIFA, U.S. lawmakers kag Cape Verde soccer federation agud lamang nga makaabot ini sa Miami kag makalantaw sa iya bata.
Sa pihak nga bahin, antes sini nga hampang, 1-1 draw man ang resulta sang hampang sang Uruguay kag Saudi.
Sunod nga maga-atubangay ang Cape Verde kag Saudi 8:00 sa aga sa Sabado, Hunyo 27, samtang masambuwa naman ang Uruguay kag Spain sa pareho man nga oras kag adlaw (Philippine Time).
