Nagpasiguro ang Department of Education (DepEd) Region 6 nga hugton pa ang implementasyon sang mga anti-bullying programs sa mga eskwelahan sa Western Visayas.
Ini bilang kabahin sang ila tikang agud maprotektahan ang seguridad kag mental health sang mga estudyante.
Sa interview sang Bombo Radyo kay Mr. Hernani Escullar Jr., Spokesperson sang DepEd 6, iya ginpahayag nga may yara na sang memorandum kag direktiba nga ginpapanaog ang Central kag Regional Office nga nagamando sa mga eskwelahan nga magpatuman sang nagkalain-lain nga kampanya batok sa bullying.
Ginpahayag ni Escullar nga mas pabaskugon pa gid ang kampanya kasunod sang nagluntad nga shooting incident sa isa ka eskwelahan sa Tacloban City nga nagresulta sa kamatayon sang tatlo ka estudyante.
Dugang pa sini, may yara sang Learners’ Rights Protection (LRP) Officers sa mga eskwelahan nga mahimo palapitan sang mga estudyante nga biktima sang bullying.
Pahayag man ni Escullar nga isa sa mga dako nga problema nga ginapangatubang sang DepEd Region 6 amo ang kakulangan sang guidance counselors sa mga eskwelahan.
Suno pa kay Escullar, sang nagligad nga tuig ila na nga na-monitor nga dako ang pag-kinahanglan sang mga guidance counselor tungod sa ila importante nga papel sa paghatag sang counselling, pagbulig sa mga mental health issues sang mga estudyante amo man ang pagsolbar sang mga kaso sang bullying kag iban pa nga problema sa eskwelahan.
Ginpahayag man sini nga indi lamang responsibilidad sang DepEd ang pagpauntat sang bullying kundi kinahanglan man ang aktibo nga partisipasyon sang mga ginikanan kag komunidad sa paggiya sang ila nga mga kabataan.
