Ginpangunahan sang 27-anyos nga superstar nga si Kylian Mbappe ang powerhouse team nga France agud nga makaabante na sa Round of 16 sang FIFA World Cup 2026.
Sa hampang nga nagsugod 5:00 kag nagtakop 7:00 subong nga aga oras sa Pilipinas, ginlutos sang former World champions kag 2022 runner-up ang Sweden, 3-0.
Naka-brace ukon duha ka goals si Mbappe nga nahimo sini sa ika-45 kag ika-74 nga minuto sang hampang. Nakadugang man sa ila goals si Bradley Barcola sa 53rd minute.
Subong man nga hampang nakuha ni Mbappe ang record sa may pinakadamo nga goals sa World Cup knockout matches sa bug-os nga maragtas.
Ang una nga goal ni Mbappe nga nahimo sa first half amo ang nag-guba sang anay patas sini nga goals sa Brazilian superstars nga sanday Leonidas kag Ronaldo sa may pinakadamo nga goals sa elimination games.
Gilayon nga nagdalagan si Mbappe pakadto kay Coach Didier Deschamps matapos ang iya una nga score.
Magluwas diri, isa ka goal na lang kag malab-ot sini ang 39-anyos nga Argentine football superstar kag captain nga si Lionel Messi nga amo subong ang naga-uyat sang all-time scoring record sa World Cup.
Sunod nga atubangon sang French team ang Paraguay halin sa South America nga amo ang nag-upset sa four-time champions nga Germany sa knockout stage kahapon 4-3 paagi sa penalty shootout.
