Nagsulod na ang powerhouse team nga Argentina sa quarterfinals sang FIFA World Cup 2026 matapos nabuhi sa katapusan nga mga minuto sang hampang batok sa Egypt sa Round of 16.
Sa tion nga halos nagapalangluya na ang fans kag ginapanan-aw na ang tuman ka daku nga upset subong nga tournament, isa ka indi malimtan nga comeback ang ginhimo sang reigning champions agud malutos ang kasumpong paagi sa tatlo ka late goals, 3-2.
Nahimo sang Argentina ang ila comeback sa sulod lamang sang nagahinunod nga 13 minutos kag 15 segundos sang hampang.
Sa ika-15 pa lamang nga minuto, naka-score na ang Egypt paagi kay Yasser Ibrahim nga amo ang naghatag sa ila sang momentum.
Matapos ang singko minutos, nasagang sang goalkeeper sang Egypt ang goal ni Lionel Messi via penalty nga amo pa gid ang nagpahugyaw sa Egyptian fans.
Sa pamuno sang second half, naka-goal liwat ang Egypt paagi kay Mostafa Zico sa counterattack, apang ginbawi ukon gin-disallow bangud pagkatapos sang review sa VAR, nakit-an nga gin-foul ni Haissem Hassan si Lisandro Martinez.
Nag-goal liwat si Mostafa Ziko sa ika-67 nga minuto sang matchup nga amo ang nagpasaka sa score sa 2-0.
Maluya pa gid gihapon ang hampang sang team ni Lionel Scaloni sa temprano nga bahin sang second half apang nagsugod ang balos sang Argentina sa bullet header ni Christian Romero sa 79th minute.
Sa tion nga labi nga kinahanglan sang iya team, nag-goal man ang captain kag 39-anyos nga captain nga si Messi sa ika-83 nga minuto nga amo ang nagpatas sang scores sang Pharaohs kag Albiceleste.
Dalayon nga naselyuhan ang kadalag-an sang South American team sa ika-92 nga minuto ukon duha ka minuto sa stoppage time paagi sa header ni Enzo Fernandez.
Atubangon sang Argentina ang magadaog batok sa Switzerland kag Colombia sa Round of 16 nga patigayunon 4:00 subong nga kaagahon – Philippine Time. Ini ang katapusan nga hampang sa last 16.
Ini ang ikaduha nga tion sa knockout stage nga nabutang sa alang-alang nga sitwasyon ang Argentina apang nakaluwas gihapon.
Sa Round of 32, matandaan nga nagdangat man sa extra time ang hampang sini batok sa debutant nga Cabo Verde, apang nagtakop man sa 3-2.
Ang goal ni Messi batok sa Egypt amo ang iya ikawalo nga goal subong nga 2026 World Cup — pinakamataas nga numero sang goals, nga ginasundan nanday Kylian Mbappe kag Erling Haaland nga pareho nga may tag-pito ka goals.#
