Ginpasalig sang Department of the Interior and Local Government (DILG) nga hatagan sang bag-o nga fire truck ang Estancia, Iloilo agud nga mapabakod ang ila nga kapasidad sa pagresponde sa sunog kag iban pa nga emerhensya.
Ini ang kasunod sang nangin panawagan ni Estancia Municipal Fire Marshal Fire Inspector Jory Biliran kay DILG Undersecterary for Public Safety Jed Patrick Mabilog nga buligan man ang banwa nga mapadasig ang pag-angkon sang bag-o nga fire truck para malikawan na ang pagtuhaw sang problema sa tion sang ila pagresponde sa sunog.
Nag-ugat ini sa insidente sa Estancia Feeder Port sang Lunes, Hulyo 13, kun sa diin wala nakabuga sang tubig ang isa ka fire truck sa nagluntad nag sunog bangud nga daan na kag nagapalya.
Bangud sa amo nga hitabo, pito ka mga baligyaan ang nasunog sa amo nga lugar nga nagbilin sang masobra sa P120,000 nga balor sang kahalitan.
Sa amo man nga insidente, gin-relieve ang fire marshal bangud gina-imbestigaran ang problema sa truck.
Kasunod sang amo nga panawagan, nagsapol sanday Mabilog, Estancia, Iloilo Mayor Bianca Requinto-Espinosa kag BFP Region VI Regional Director Fire Chief Superintendent Edwin Vargas agud mapangitaan sang gilayon nga solusyon ang kinahanglanon sang banwa para sa bag-o nga fire truck.
Suno kay Mabilog, kasunod sang hinun-anon, hatagan sang bag-o nga truck ang Estancia sa pinakamadasig nga tion agud nga makaresponde sang epektibo pati na sa kaiping nga mga banwa.
Pahayag pa sang DILG official, ginmanduan man sini ang BFP regional director nga maghimo na sang imbentaryo sa fire trucks kag iban pa nga mga fire equipment sa Western Visayas.
Ini agud nga mahisayran sang ahensya kun ano ang kulang kag problema.
Dugang ni Mabilog, ginahimo nila ini sa tanan nga mga rehiyon kasunod sang mandu halin sa Interior Secretary Jonvic Remulla agud nga mapasangkad ang kapasidad sang BFP kag mahatagan man sang atensyon ang kinahanglanon pati sang iban nga ahensya kaangay sang Bureau of Jail Management and Penology (BJMP).
