Gindayaw ni Deputy Speaker kag spokesperson sang prosecution team nga si Rep. Janette Garin, ang klaro kag maathag nga pagpresentar sang prosecution may kaangtanan sa grave threats nga kaso batok kay Vice President Sara Duterte.
Sa interview sang Bombo Radyo kay Garin, iya ginapahayag nga nangin mapag-on ang basehan sang kapin 200 ka mga miyembro sang House of Representatives sa pagpasaka sang impeachment complaint batok sa bise presidente.
Suno sa iya, indi lamang isa ka pagpamahog ang ginbuhat sang Bise kundi may yara pa sang iban nga mga insidente nga ginbasehan sang reklamo.
Ginpabutyag man niya nga indi lamang ini “obra-obra” bangud suportado ini sang mga ebidensya nga ginpresentar sang ila team.
Dugang pa ni Garin, solido ang mga ebidensya nga ginpasa sang prosecution, gani nagahatag ini sang mapag-on nga basehan sa mga alegasyon nga ginapangatubang ni VP Sara Duterte.
Gina-ekspektar man ni Garin nga sa masunod nga trial, magapadayon na ang pagtalakay sa Article 1, upod ang pagpresentar sang mga iban pa nga testigo.
Ginapaabot man sini nga pagatalakayon ang isyu sa confidential funds, kag mabantayan kon paano ini sabton sang kampo sang depensa, ilabi na ang pamangkot kun sa diin gin-gasto ang mga pondo sa idalom ni VP Sara Duterte.
