Magatukod ang Iloilo Provincial Government sang mga inter-agency operations security offices sa mga nagkalain-lain nga pantalan sa probinsya.
Ini agud mangin headquarters sang K9 teams kag mapabaskog pa ang pagbantay batok sa posible nga pagsulod sang ilegal nga droga sa probinsya.
Sa interview sang Bombo Radyo kay Iloilo Governor Arthur Defensor Jr., iya ginpahayag nga nagsugod na sang Hulyo 7 ang deployment sang K9 units sa Dumangas Port kag sa Iloilo International Airport kag sang Hulyo 21 naman sang gintukod ang K9 unit sa Estancia Port.
Suno kay Defensor, indi na kinahanglan magpatindog sang bag-o nga mga building bangud mahimo nga gamiton ang existing nga mga opisina sang partner agencies sa kada pantalan.
Pahayag sini nga pagabutangan sang mga computer kag CCTV cameras ang mga inter-agency offices agud mas mapabaskog pa ang operasyon sang K9 units.
Suno pa sa gobernador, padayon ang pagdugang sang mga preventive measures sang probinsya agud mapunggan ang posible nga pagsulod sang ilegal nga droga.
Dugang pa niya nga kabahin ini sang mas malapad nga kampanya sang probinsya pinaagi sa intelligence operations kag koordinasyon sa nagkalain-lain nga ahensya agud mapabaskog ang seguridad sa probinsya sang Iloilo.
