Nagpasaka na ang Office of the Ombudsman sang mga kaso batok kay USWAG Ilonggo Party-list Rep. Jojo Ang kaangot sa ginapahayag kahilabtanan sini sa major government contractors.
Suno sa kumpirmasyon sang Sandiganbayan subong gid lamang nga hapon, 14 ka counts sang graft ang gin-file batok kay Ang.
Kaupod nga napasakaan man sang kaso amo si former Sultan Kudarat 2nd District Rep. Arnulfo Go nga nagapangatubang sang two counts sang graft kag two counts sang malversation.
Base sa court record, ginpasaka ang kaso subong nga adlaw, Hulyo 25, batok kay Ang bangud sang ginaalegar nga paglapas sang Section 3(h) sang Republic Act No. 3019 ukon ang Anti-Graft and Corrupt Practices Act.
Gilayon man nga gin-raffle ang kaso kag gin-distribute sa pito ka mga division sang amo nga anti-graft court.
Nahibaluan nga gina-angot si Ang sa IBC International Builders Corp. kag sa Allencon Development Corp. nga nakakuha sang madamo nga kontrata sa public works halin sang 2016 tubtub sang 2024.
Gin-file ang kaso duha ka adlaw antes ang ikalima nga State of the Nation Address ukon SONA ni President Ferdinand “Bongbong” Marcos, Jr.
Matandaan nga isa si Ang sa mga kongresista nga ginrekomendar sang Independent Commission for Infrastructure ukon ICI nga pasakaan sang kriminal kag administratibo nga mga kaso bangud sang gina-alegar nga mga iregularidad sa mga flood control projects.
Nauna na sini nga ginpanginwala nga gin-gamit niya ang iya posisyon sa gobyerno para sa personal nga interes ukon kaayuhan.
Nauna naman nga nagsabat si Ang sadtong 2025 nga handa siya nga atubangon ang ano man nga reklamo nga ipasaka batok sa iya sa Ombudsman, samtang ginapabilin niya nga matinlo ang iya konsensya sa tunga sang mga alegasyon nga nagaangot sa iya sa mga construction firm nga gin-flag bangud sa imbestigasyon may kaangtanan sa ginapatihan nga korapsyon sa mga proyekto sa imprastruktura.
By: Bombo Jissa Padios
