Mas ginpasangkad sang Iloilo City Government ang mental health support para sa mga estudyante sa siudad sang Iloilo, matapos nga nagpirma sang Memorandum of Agreement (MOA) si Mayor Raisa Treñas, kaupod ang Colegio del Sagrado Corazon de Jesus, Inc., kahapon nga adlaw.
Una nga educational institution nga nagpasakop sa Mental Health–RAISE Psychosocial Support Partnership Program sang siudad ang nasambit nga buluthuan kun sa diin tinutuyo sini nga mapabakod ang mental health awareness, prevention, intervention, referral kag support services para sa mga estudyante, school personnel kag sang bilog nga komunidad.
Suno kay Joy Fantilaga Gorzal, spokesperson ni Mayor Treñas, importante gid sa alcalde ang nasambit nga partnership ilabi na subong nga madamo ang mga isyu ang ginapangatubang sang mga estudyante.
Pinaagi sa Mental Health–RAISE Psychosocial Support Partnership Program, magapatigayon ang siudad sang mga seminar, lecture, psychoeducational activities kag information campaigns agud mapasangkad ang ihibalo sang publiko nahanungod sa mental health.
Nagalaum man ang alcalde nga madamo nga mga eskwelahan ang maga-upod sa programa agud mas mangin accessible ang nagakaigo nga mga mental health services sa mga kabataan.
