Dakop sa ginpatigayon nga drug buy bust operation ang isa ka freelance nga masahista kagab-i sa Jaro Plaza, Hulyo 29.
Kasunod ini sang ginpatigayon nga operasyon sang Drug Enforcement Team Iloilo City Police Station 9 kun sa diin narekober sa subject ang anum ka sachet sang suspected shabu nga may ara sang standard drug price nga P40,000.
Ang subject amo ang 31-anyos nga lalaki kag residente sang Sta. Barbara, Iloilo.
Nahibaluan nga isa ka street level individual ang arestado kun sa diin may daan man ini nga kaso nahanungod sa iligal nga droga nga nadakpan sang tuig 2023.
Sa subong, yara na sa kustodiya sang ICPS 9 ang subject matapos sini nga ginbayolar ang RA 9165 Comprehensive Dangerous Drugs Act of 2002.
