Ginpakamalaot ni Vice President Sara Duterte ang sitwasyon sang Philippine journalism nga suno pa sa iya wala nakalab-ot sa international standard.
Gin-akusaran sini ang pila ka local media nga suno pa sa iya nga ginauna pa ang kita kaysa unahon ang responsable nga pagbalita.
Ini nga pahayag halin sa Bise Presidente ang natabo kadungan man sang iya nga pagbisita sa iya amay nga si anay President Rodrigo Duterte sa The Hague, The Netherlands nga napreso subong bangud sa kaso sini nga ginapangatubang sa International Crimninal Court.
Suno kay Duterte, may mga tion nga ginapaguwa ang iya mga pahayag sa wala sa husto nga konteksto agud malaragway kag mapakita siya kag ang iya pamilya sa negatibo nga pamaagi.
Dugang pa sang bise presidente, mas mataas ang kalidad sang balita sa international media, ilabi na sa ila pamaagi sang pagtalakay kag pagpili sang mga importante nga isyu.
Ginsiling man sini nga dako gid ang bulig sang social media agud makita sang publiko ang nagkalain-lain nga panan-awan kag ang aktuwal nga nagakatabo.
Ginakabalak-an man sang bise presidente ang nagabag-o nga karakter sang pila ka mga Pilipino, nga mas ginahatagan pa sang bili ang kwarta kaysa sa mga positibo nga prinsipyo.
Gina-agda man ni VP Sara Duterte ang publiko nga padayon nga tagaan sang importansya ang bayanihan, disiplina, pagkamaisog, kag ang integridad.
