Ginbaha ang tatlo ka barangay sa Barotac Nuevo, Iloilo matapos nag-awas ang tubig sang Tinuri-an River.
Ini bangud sa padayon nga pagbubu sang mabaskog nga pag-ulan sang nagligad nga mga inadlaw.
Sa interview sang Bombo Radyo kay Ret. Police Colonel Cornelio Salinas, head sang Provincial Disaster Risk Reduction and Management Office (PDRRMO), iya ginpahayag nga ang mga barangay nga naapektuhan amo ang Igbong, Sohotan, kag Tinuri-an.
Suno kay Salinas, may mga residente nga temporaryo nga nag-evacuate halin sa ila mga balay bangod sa pagsaka sang tubig baha, apang nakabalik man sila sa ila mga balay pagkaligad sang pila ka oras matapos mag-subside man gilayon ang tubig.
Ginpahayag man niya nga bangud tuman ang pagbubu sang ulan sa probinsya, nagresulta ini sa pag-awas sang mga waterways kag drainage system.
Dugang pa niya, nakadugang man sa pagbaha ang pagpugong sang mga lay-on kag basura sa mga drainage.
Nagpanugyan naman si Salinas sa publiko nga padayon nga tinluan ang mga drainage agud malikawan ang pagbara sini kun magluntad ang mamunog nga pag-ulan.
Gindugang pa niya nga ang masami nga pagbaha mahimo nga epekto sang global warming kag kakulangan sang mga puno sa lugar nga makabulig kuntani kun magluntad ang mamunog nga pag-ulan kag pagbaha.
By: Bombo Ireca Faye Pioquinto
