Nagtaliwan na sa edad nga 65-anyos ang beterano nga entertainment journalist kag radio host nga si Jobert Sucaldito.
Ginkumpirma ini sang OOTD Jobert and Chaps Channel, ang YouTube channel sang iya director nga si Chaps Manansala.
Sa ila pahayag, nagpasalamat ang pamilya kag mga malapit nga abyan ni Sucaldito sa padayon nga paghigugma, pangamuyo, kag pagsuporta nga ginhatag sang publiko kay Jobert sa sulod sang madamo nga tuig.
Sang Hulyo, nagpangabay man sang pangamuyo si Chaps Manansala para kay Sucaldito matapos ini ma-confine sa Providence Hospital sa Quezon City sulod sang halos isa ka bulan bangud sang anxiety kag kakulangan sa tulog.
Sa subong, wala pa sang opisyal nga impormasyon nga ginpaguwa nahanungod sa rason sang iya kamatayon.
Si Jobert Sucaldito isa ka kilala nga personalidad sa entertainment journalism kag radio broadcasting.
Nakilala siya bangud sang iya maisog nga mga komentaryo kag madamo nga eksperyensya sa industriya sang showbiz.
