Naglapas sa regulasyon sang Land Transportation Office may kaangtanan sa reckless driving ang driver sang motorsiklo nga wala nagdulog kag naghatag prayoridad sa mga pedestrian nga nagatabok sa Diversion Road, Mandurriao, Iloilo City sang Hulyo 27, 2026.
Sa interview sang Bombo Radyo kay Atty. Gaudioso Geduspan II, Regional Director sang Land and Transportation Office (LTO) 6, iya ginapahayag nga dapat sundon sang mga motorista ang regulasyon sa dalanon agud indi ang mga ini makahatag sang peligro sa kabuhi sang iban.
Suno pa kay Geduspan kaangay nga kulang sa edukasyon nahanungod sa patakaran sa dalanon ang amo nga motorista kag makabig gid nga reckless driving ang nangin akto sini sang amo nga tion.
Sa karon padayon pa ang pag-identify sang LTO 6 sa motorista bangud paga-isyuhan ini sang show cause order agud mapasabat sa natabo.
Pahayag pa ni Geduspan nga ang mga kaangay sini nga hitabo ang nagahatag gid sang leksyon sa mga motorista nahanungod sa road safety nga dapat mangin respondable nga mga driver sa dalanon.
Nahibaluan nga base man sa regulasyon sang Land Transportation and Traffic code ukon ang Republic Act No. 4136, obligado ang mga motorista nga mag-untat kag maghatag sang tion ang mga driver sa mga nagatabok sa pedestrian lane.
