Ginsaway naman ni Presiding Officer Chiz Escudero ang testigo nga si Commission on Audit (COA) auditor Roderick Wamil kasunod sang estilo sang pagsabat sini kay Senator Judge Imee Marcos.
May kaangtanan ini sang nangin paathag ni Wamil nga wala lang ginalimita kanday DepEd Special Disbursing Officer Edward Fajarda kag OVP Special Disbursing Officer Gina Acosta pag-abot sa accountable officers sang isa ka opisina.
Suno kay Marcos, indi makonsiderar nga accountable officer ang bise presidente ilabi na nga indi man ini ang nakalista nga payee ilabi na nga yara sa joint circular nga ang special disbursing officer ang gindesignar sang head of agency.
Apang nagsabat man kag nanindugan si Wamil nga mismo nga head sang ahensya ang responsable base sa idalom sang nasambit nga joint circular.
Didto na kag nagsabat si Marcos nga dapat “yes or no” lang ang isabat sang testigo matapos ang ginapahayag sini nga pagpang-away ni Wamil sa iya.
By: Bombo Joedel Nollaga
