Gin-isyuhan sang citation ticket ang empleyado sang Iloilo City Hall nga nakuhaan sang litrato nga nagamaneho kag nagaangkas sa motorsiklo nga wala sang suksok nga helmet.
Sa interview sang Bombo Radyo kay Retired Police Colonel Uldarico Garbanzos, head sang Iloilo City Traffic and Transportation Management Office (ICTTMO)iya ginpahayag nga nagpadulong sa ila opisina ang duha ka job hires agud magpaathag sa natabo.
Suno kay Garbanzos, nagpahayag ang duha nga halin sila sa ila gin-ubrahan kag malapit lamang kuntani ang ila kadtuan, gani wala na sila nakasuksok sang helmet.
Bangud sa paglapas sa traffic regulations, gin-issuehan sila sang P500 nga citation ticket kag ginpahibalo man nga papanaugan sila sang show cause order sang Land Transportation Office (LTO).
Nagpangayo naman sang pasaylo ang duha ka empleyado kag nagpasalig nga indi na nila pagliwaton ang amo nga paglapas sang nasambit nga patakaran.
Nahibaluan nga ang driver ang naga-obra sa Facility Conservation Office (FCO) samtang ang iya angkas naman ang naga-obra sa City Health Office (CHO).
Nagpahanumdom naman si Garbanzos sa tanan nga mga empleyado sang gobyerno nga mangin ehemplo sa publiko paagi sa pagsunod sa mga traffic rules and regulations.
