Ginsuportahan ni Iloilo City Councilor Nene Dela Llana ang House Bill No. 10136 ukon ang Medical Parole Act nga gin-file ni House Senior Deputy Minority Leader kag Mamamayang Liberal Party-list Rep. Leila de Lima.
Ini nga hagna may tinutuyo nga mahatagan sang kahigayunan ang terminally ill nga mga Persons Deprived of Liberty (PDL) nga makaupod ang ila pamilya bisan sa katapusan na lang nga bahin sang ila nga kabuhi.
Sa interview sang Bombo Radyo kay Iloilo City Councilor Nene Dela Llana, iya ginpahayag nga makatawhanon ang nasambit nga House Bill bangud may mga preso nga tigulang na kag ang iban ang may malala na masakit kag indi na makahatag sang peligro sa komunidad.
Ginpahayag man ni Dela Llana nga antes tagaan sang medical parole ang isa ka PDL, kinahanglan anay nga ma-review sang Board of Pardons and Parole agud masiguro nga sentensyado na ang inmate, may irreversible nga balatian kag indi na makahatag sang peligro sa iban ng tawo.
Ang nasambit nga House Bill, indi applicable sa mga PDL nga wala pa nasentensyahan ukon padayon pa ang ila kaso.
Nahibaluan nga ang House Bill No. 10136 nga gin-file ni De Lima sang Hulyo 21, nga may tinutuyo nga ma-institutionalize ang medical parole sa humanitarian grounds.
Base sa amo nga hagna nga ang mga PDL nga may terminal illness kag irreversible physical incapacitation amo lang ang kwalipikado nga mahatagan sang medical parole.
