Gina-engganyo sang Iloilo City Health Office ang publiko nga mag-avail sang libre nga chest x-ray sa Agosto 25 sa MH Del Pilar Gym sa Jaro, Iloilo City bilang kabahin sang selebrasyon sang National Lung Month kag Charter Day sang syudad.
Suno kay Estrella Fortuna, Tuberculosis Program Coordinator sang Iloilo City Health Office, iya ginpahayag nga bukas ang serbisyo para sa mga residente nga naga-edad 15 anyos pasaka, ilabi na sa mga senior citizen.
Dugang pa ni Fortuna, mahimo man nga maka-avail sang libre nga chest x-ray ang iban pa nga mga residente sa distrito sang Molo, Mandurriao, Lapuz kag La Paz agud mangin madamo pa nga mga residente sang syudad ang mahatagan sang nasambit nga serbisyo.
Ginpahayag man niya nga dako nga bulig ini sa komunidad bangud mahal ang gasto sa chest x-ray, gani nagapanawagan ini sa publiko nga magpabulong kag magpa-check up kon may ginabatyag nga sintomas sang tuberculosis ukon TB.
Nahibaluan nga pinaagi sa kolaborasyon sang Iloilo City Government, City Health Office kag Philippine Tuberculosis Society Incorporated (PTSI) Screens Project, ila ginatingwaan nga mabuligan ang mga residente sa syudad nga matapna ang pagdamo sang sakit nga TB.
