Nagapati si Ombudsman Jesus Crispin Boying Remulla nga magabalik sa Pilipinas sanday Sen. Loren Legarda kag bata sini nga si Batangas Rep. Leandro Leviste.
Ini matapos ang pagkadto sang mag-iloy sa luwas sang pungsod kun sa diin separado ang mga ini nga nagbiyahe pakadto sa Europa.
Nahibaluan nga ginaimbestigaran sang Ombudsman sanday Legarda kag Leviste bangod sa mga reklamo nga plunder kag graft.
May kaangtanan ini sa kapaslawan sang renewable energy company ni Leviste sa paghatag sang solar power service sang ila prangkisa nga gin-aprubahan sang Kongreso.
Samtang, ginkumpirma naman ni Senator Loren Legarda paagi sa iya written statement nga nag-file siya sang medical leave rason nga nagkadto ini sa luwas sang pungsod.
Suno kay Legarda, halin Agusto 3 tubtob 5 ang iya nga leave kag nagsunod man ini sa patakaran sang senado.
Ginkumpirma man ni Senador Erwin Tulfo nga nakapangayo sang permiso ni Legarde antes ini naghalin sa Pilipinas.
Amo man ini ang rason kun ngaa wala makatambong ang senadora sa nagapadayon nga impeachment trial batok kay VP Sara Duterte.
Naghingyo man ang senadora sa publiko nga indi maghimo sang mga konklusyon kaangot sa iya pagbiya sa pungsod kaupod ang iya anak nga si Rep. Leandro Leviste.
Sa matandaan nga antes pa nagsugod ang imbestigasyon sang Ombudsman, nagpasaka na ang Department of Energy sang reklamo sa Department of Justice batok kay Leviste kag sa lima pa ka opisyal sang Solar Para sa Bayan Corporation.
Ini bangod sa paglapas ni Leviste sa Public Service Act.
Base sa reklamo, napaslawan ang kumpanya sa pagtukod kag paghatag sang kuryente sa mga consumers kag end users sa mga malayo nga lugar nga nalakip kuntani sa ila pagahatagan sang serbisyo.
