Hugot nga ginpanginwala ni anay House Speaker kag Leyte Representative Martin Romualdez ang akusasyon sang Ombudsman nga siya ang sa likod sang pagbawi sang mga affidavit sang pila ka “Maleta Boys.”
Pahayag pa ni Romualdez, wala sang kamatuoran ang akusasyon nga ginahaboy batok sa iya kag nagapangita lamang sila sang alegasyon para lamang madalahig ang iya nga pangalan.
Suno sa iya, ang pagbawi sang “maleta boys” sa ila mga ginsumpaan nga pahayag nagapamatuod lamang nga ginhimo-himo ang mga akusasyon nga naga-angot sa iya sa ginapahayag nga mga anomaliya sa flood control projects.
Dugang pa sang kongresista, handa siya nga atubangon ang tanan nga alegasyon kag pamatud-an nga inosente ini.
Matandaan nga si Ombudman Jesus Crispin “Boying” Remulla ang nagtudlo kay Romualdez nga amo suno sa iya ang posible nga yara sa likod sa pag-retract ukon pagbawi sang statement sang apat ka Maleta Boys.
Sa pihak nga bahin, nagpahayag man si Ombudsman Remulla nga posible nga makasuhan ang mga anay bodyguard nga nag-atras sang ila nauna nga mga testimonya.
Suno sa iya, indi pabor ang mga korte sa pagbawi sang affidavit, ilabi na kon makaduha na ka beses nga nakahatag sang nagkalain-lain nga mga pahayag ang mga testigo.
Dugang pa ni Remulla, mahimo nga madala bilang mga akusado ang mga anay security personnel kon indi na ang mga ini magserbe nga mga testigo sa nagapadayon nga imbestigasyon.
