Nagapabilin sa gihapon nga naka-heightened alert status ang mga kapulisan sang Western Visayas subong nga tion ilabi na ma-eksperyensyahan ang halit nga dala sang Southwest Monsoon ukon habagat.
Sa interview sang Bombo Radyo kay Police Regional Office 6 Regional Director PBGen Randulf Tuaño, iya ginpahayag nga ang naka-heightened alert status ang mga police personnel sa mga lugar nga nagakinahanglan sang clearing operations kag police visibility.
Suno sa iya, nagapatigayon sang mga clearing operations ang mga kapulisan sa lugar nga apektado kaangay sang mga dalan nga madamo sang obstruction, mga lugar nga may yara sang puno nga nagkalatumba kag mga bato nga nagabalabag sa mga kalsada.
Naga-assist man ang pulis sang mga residente nga nagakinahanglan sang bulig nga makabalik sa ila nga mga balay.
Pahayag pa ni PBGEN Tuaño, nagapabilin sa gihapon ang 24/7 police visibility nga nagapatrolya sa bug-os nga rehiyon.
Ginpahayag man sini nga wala sang may nasamaran ukon nabutang sa peligro nga police personnel ang PRO 6 ilabi na sa tion nga nagapatigayon ang mga ini sang rescue kag clearing operations.
Dugang pa sang Regional Director, pagasiguradon sang PRO 6 nga mabatyagan ang presensya sang kapulisan sa ano man nga klase sang kalamidad agud masiguro ang seguridad sang publiko.
