Naglab-ot na sa malapit 1,600 ka kaso sang dengue ang na-rekord sang Iloilo Provincial Health Office humalin sang Enero 4 tubtob Agosto 1, 2026, kun sa diin anum na ang napatay.
Sa interview sang Bombo Radyo kay Dr. Maria Socorro C. Quiñon, head sang Iloilo Provincial Health Office, iya ginpahayag nga mas manubo ini sang 57% kun ikumpara sa masobra 3,600 ka kaso nga may 14 ka napatay sa kapareho nga period sang nagligad nga tuig.
Pahayag pa sini nga ang banwa sang Calinog ang may pinakadamo nga dengue cases nga naglab-ot sa 145, sunod ang banwa sang Cabatuan nga may 130 kag Estancia nga may 100 ka kaso sang dengue.
Suno pa kay Dr. Quiñon, sa anom ka napatay, duha ang na-rekord halin sa banwa sang Estancia, samtang tag-isa naman sa banwa sang Carles, Ajuy, Dingle kag San Dionisio.
Nagapangabay naman ang Iloilo Provincial Health Office sa publiko nga kun may ara sang naeksperyensyahan nga sintomas sang dengue, indi na paghulaton nga maglala ini antes magpakonsulta.
Dugang pa sang opisina nga mas maayo gid nga matatapan gilayon ang mga tawo nga may ara sang warning signs sang dengue bag-o pa maglala ang epekto sini.
