Nagpalab-ot sang pagpangamuyo si Pope Leo XIV para sa mga pumuluyo sang Colombia kasunod sang magnitude 7.4 nga linog nga nagbilin sang masobra na 240 ka mga patay.
Suno kay Vatican secretary of state Pietro Parolin, nasubuan gid ang Santo Papa sa amo nga trahedya. Ginapangamuyo sini ang kalinong sang mga nagtaliwan, kag amo man ang pagbangon sang mga apektado nga mga lugar.
“The Holy Father, deeply saddened to learn the painful news of the earthquake that has seriously affected several areas of Colombia… offers prayers for the eternal rest of the deceased and raises his prayers to the Lord for the prompt recovery of those affected by this tragedy,” suno kay Parolin sa iya sulat kay Archbishop of Cartagena Francisco Javier Munera Correa.
Nagpasalig naman ang Estados Unidos nga gina-monitor sini ang sitwasyon kag handa nga magbulig sa mga Colombian sa sining mabudlay nga tion. Nauna na nga gin-anunsyo sang US ang $15.5 million nga emergency relief.
Ginkumpirma naman ni European Union chief Ursula von der Leyen nga gin-mobilize na sang EU ang Copernicus nga isa ka satellite service agud nga makabulig sa rescue operations.
Nagtanyag man sang bulig ang iban nga nasyon kaangay sang Israel, Mexico, Ecuador kag France.
Nahibaluan nga gindeklarar na ang state of emergency sa Colombia.
Magluwas sa mga napatay, ginkumpirma man sang newly inaugurated president nga si Abelardo De La Espriella nga may 700 nga napilasan kag 5,000 ka mga balay ang nagkalaguba bangud sa linog.#
