Ginaduso ni 5th District BM Nielito Tupas, chairman sang Committee on Aquatic Resources ang paghimo sang ordinansa nga magaprotekta sa mga manugpangisda batok sa commercial fishing.
Suno kay Tupas, importante nga maprotektahan ang kinamatarong kag natural resources sang probinsya, ilabi na bangud may mga concern nahanungod sa mga border ukon boundary sang fishing areas.
Sa interview sang Bombo Radyo kay Tupas, iya ginpahayag nga desidido ang Committee on Aquatic Resources nga mag-focus sa paghimo sang provincial proposed ordinance nga magahatag sang dugang nga proteksyon sa mga manugpangisda kag sa marine resources.
Pahayag sini nga kinahanglan ang konsultasyon kag pagkuha sang inputs halin sa mga eksperto.
Dugang pa niya, kinahanglan ang koordinasyon kag kooperasyon sang nagkalain-lain nga ahensya sang gobyerno kag mga sektor agud masolusyunan ang mga concern.
