Nagpahanumdom ang Iloilo Provincial Health Office sa publiko sang mga tikang agud mapunggan ang paglapta sang dengue sa ila nga lugar.
Ini matapos makarekord sang dengue clustering cases sa 23 ka banwa kag isa ka syudad sa probinsya sang Iloilo.
Sa interview sang Bombo Radyo kay Arianne Tracey Holipas, Dengue Program Coordinator sang PHO, iya ginpahayag nga ginakabig nga may clustering sang dengue kun may tatlo ukon sobra pa ka kaso sa sulod sang apat ka magkasunod nga semana sa isa ka lugar.
Suno kay Holipas, kinahanglan nga tutukan kag ma-monitor gilayon ang mga lugar nga may clustering sang dengue bangud mahimo ini magresulta sa dugang pa nga pagsaka sang kaso kun indi gilayon matatapan.
Gani, ginapanawagan sang PHO ang publiko nga sundon ang 4S Strategy kontra dengue.
Una, Search and Destroy, pangitaon kag gub-on ang mga breeding sites ukon mga lugar nga ginatiniran sang lamok.
Ikaduha, Secure Self-Protection, protektahan ang kaugalingon batok sa kagat sang lamok.
Ikatatlo, Seek Early Consultation, magpakonsulta gilayon sa health facility kun may mga sintomas sang dengue.
Kag ikaapat, Support Fogging and Spraying, suportahan ang mga fogging kag spraying activities sa mga lugar nga kinahanglan sini.
Ginpahanumdom man sang PHO nga indi lamang responsibilidad sang health authorities ang pagpugong sang dengue.
Kinahanglan man suno sa opisina ang aktibo nga partisipasyon sang publiko, ilabi na sa regular nga pagpanglimpyo sang panimalay kag palibot.
