Ginpanindugan ni President Ferdinand Marcos Jr. nga indi ill-gotten ang mga manggad kag propedad sang iya nga pamilya.
Ini matapos ginbasura ang civil cases batok sa iya pamilya matapos mapamatud-an nga indi halin sa malain nga binuhatan ukon kinawatan ang mangad sang mga ini.
Ini nga pahayag sang Presidente natabo sa luncheon sang Foreign Correspondents Association of the Philippines matapos ginpamangkot ini nahanungod sa amo nga isyu.
Ginpakigbahin man niya nga wala na sini matatapan ang pila sa iya mga obligasyon bilang co-executor sang estate sang iya amay bangud masako na ini sa iya obligasyon bilang Presidente sang pungsod.
Pahayag pa sini nga ginatugyan nalang sini tanan ang mga kinahanglan asikasuhon sa iya nga abogado.
Dugang pa sini nga bukas ang iya abogado sa pagsabat sang mga palamangkutanon nahanungod sa amo nga isyu.
Nahibaluan nga base sa mga record, sang tuig 1997, nagdesisyon ang Supreme Court nga kinahanglan magbayad ang pamilya ni anay President Ferdinand Marcos Sr. sang kapin P23 bilyon nga estate tax.
Apang bangud wala ini nabayaran, nagdako pa ang kantidad bangud sa mga penalty kag interest.
Suno kay retired Supreme Court Justice Antonio Carpio, ang estate tax liability sang pamilya Marcos naglab-ot na sa P203 bilyon.
Ang estate tax amo ang buwis nga ginapabayran sa mga nabilin nga properties kag assets sang isa ka tawo pagkatapos ini mapatay.
