Ginbasura sang Sandiganbayan ang graft case batok kay Department of the Interior and Local Government ukon DILG Usec. kag anay Iloilo City Mayor Jed Patrick Mabilog.
Ini may kaangtanan sa alegasyon nga paghatag sini sang kontrata sa isa ka towing services firm.
Suno sa korte, tuman ang pagka-delay sang preliminary investigation, kag wala naklaro sang Office of the Ombudsman kon ngaa nadugayan ang pagpasaka sang kaso.
Nahibaluan nga gin-akusaran si Mabilog kag ang iban pa nga nagpasulod sa isa ka memorandum of agreement kaupod ang 3L Towing Services.
Gintugutan ni Mabilog ang kompanya nga mag-clamp kag mag-tow sang mga salakyan nga ilegal nga naka-park sa Iloilo City apisar wala nag-agi sa competitive process.
Base sa rekord sang korte, ginpasaka ang reklamo batok kay Mabilog sang Abril 2015.
Nabaton naman sang Ombudsman ang iya counter-affidavit sang Agosto sang amo man nga tuig, samtang ginpagwa ang consolidated resolution sang Marso 2017.
Sang Hunyo 2019, gin-confirm sang Ombudsman nga pinal na ang resolusyon.
Apang sang Marso 2023 pa napasaka ang kaso sa Sandiganbayan.
Bangod sini, naglab-ot sa malapit walo ka tuig ang nagligad halin sang pagpasaka sang reklamo tubtob sa pagpasaka sang information sa korte.
Gin-athag sang Ombudsman nga bangud sa distansya sa tunga sang Cebu office kag sang ila central office amo man sa epekto sang COVID-19 pandemic rason nga na-delay ini.
Upod sa pagbasura sang kaso, gin-cancel man sang korte ang hold departure order batok kay Mabilog kag ginmando ang pag-release sang iya bail bond.
