Ginkumpirma ni Senate Secretary Renato Bantug Jr. nga ginpalawig pa ang medical leave ni Senator Loren Legarda tubtob sa una nga semana sang Setyembre.
Suno kay Bantug, nagpadala sang abiso ang opisina ni Legarda nga maga-leave ang senadora sa Agosto 24-26 kag Setyembre 1- 2, 2026.
Halin sang Agosto 3 pa ang leave ni Legarda.
Katapusan siya nga nakit-an sa upper chamber sang Hulyo 29 kadungan sang plenary session.
Nauna na nga gin-flag sang Office of the Ombudsman bilang “suspicious” ang duha ka bulan nga travel authority nga nakuha ni Batangas 1st District Representative Leandro Leviste kag ang pag-extend sang medical leave ni Legarda.
Nagaatubang sang reklamo nga plunder kag graft ang nasambit nga mag-iloy bangud sa alegasyon nga wala nakahatag sang solar power ang renewable energy firm ni Leviste santo sa ginapangayo sang iya congressional franchise.
Suno kay Ombudsman Jesus Crispin “Boying” Remulla, nalakip si Legarda sa gina-imbestigaran bangud nakakuha si Leviste sang franchise sang 2019 sang chairperson pa si Legarda sang Senate Finance Committee.
Ginapanginwala naman ni Legarda ang mga alegasyon kag ginpahayag nga padayon niya nga ginatipigan ang iya integridad.
Nauna na nga ginpahayag sang National Bureau of Investigation (NBI) sang Agosto 7 nga nagpadulong sa France si Legarda samtang nagkadto naman sa Hong Kong ang iya anak nga si Leviste.
