Nagpangabay si Vice President Sara Duterte sa Supreme Court nga ipa-untat ang iya kaso-kriminal batok sa iya nga amo ang three counts sang grave threats.
Suno sa bise-presidente, indi dapat mapasakaan sang criminal case ang isa ka impeachable official samtang yara pa ini sa puwesto.
Sa 28 ka pahina nga petisyon, ginhingyo ni Duterte, paagi sa iya mga abogado nga ginapangunahan ni Atty. Paul Lawrence Lim, nga magpagwa ang Supreme Court sang temporary restraining order (TRO) batok sa proceedings kag i-nullify ang resolusyon sang Department of Justice (DOJ) nga nangin basehan sa pagpasaka sang kaso.
Ginpasa ang petition matapos ginbasura sang Quezon City Regional Trial Court ang motion ni Duterte nga i-dismiss ang mga kaso kag nagpagwa ini sang warrant of arrest batok sa iya.
Gin-insister ni Duterte nga ang 1987 Constitution kag mga nagligad nga desisyon sang korte nagahatag sang limited procedural immunity sa mga impeachable official batok sa criminal prosecution samtang yara pa sila sa puwesto.
“With the evident haste by which (Duterte’s) criminal prosecution continues to move, there is a real and present danger that the reliefs sought… the restraint of criminal prosecution of an incumbent impeachable officer–under the constitutional rule of limited procedural immunity, will be rendered moot and academic, if immediate injunctive relief is not now obtained,” suno sa mosyon sang vice president.
Pahayag ni Duterte, kinahanglan anay nga maagi sa impeachment kag removal sa puwesto ang isa ka impeachable official antes ini mapasakaan sang criminal case kon may yara sang bastante nga basehan.
Gin-alegar man niya nga ang pagpadayon sang kaso samtang siya Vice President mahimo magpanghilabot sa gahum sang Kongreso sa impeachment kag maglapas sa prinsipyo sang separation of powers.
Suno naman kay Justice Sec. Fredderick Vida, indi immune from suit si Duterte apisar nga siya ang una sa linya sang succession.
“Yan ay isang usapin na idinulog ng ating VP sa Korte Suprema, consistent ang DOJ, sa umiiral na batas sa Pilipinas, ang meron lamang pong immunity from suit habang nakaupo ay ang ating mahal na pangulo. Ang VP sa partikular na bagay na ito ay walang immunity from suit,” suno sa Justice Secretary.
Si Vida, si Prosecutor General Richard Anthony Fadullon, kag ang National Bureau of Investigation-Cybercrime Division amo ang respondents sa petisyon nga ginpasaka sang vice president.#
