Personal nga magatambong si Vice President Sara Duterte sa iya arraignment subong nga Biyernes sang aga, Septyembre 11, may kaangtanan sa tatlo ka kaso sang grave threats.
Suno sa iya bag-o nga spokesperson nga si Atty. Paolo Panelo Jr., himuon ang arraignment sa Quezon City Regional Trial Court Branch 98 alas-8:30 sang aga.
Pahayag ni Panelo, personal nga magaatubang si Duterte sa korte santo sa ginapatuman sang kasuguan.
Sa arraignment, pormal nga ipahibalo kay Duterte ang mga kaso batok sa iya kag papilion siya kung guilty ukon not guilty ang iya plea.
Nagpyansa na sang P360,000 si Duterte para sa tatlo ka kaso, apang matandaan nga nagpahayag ini nga wala siya sang pagsalig sa korte, pulis, kag pati sa mga security personnel nga naka-assign sa pagprotektar sa iya.
Nag-ugat ang kaso sa mga pahayag ni Duterte sa isa ka online press conference sang November 23, 2024, kun sa diin nagsiling siya nga may nakaistorya na siya sa pagpatay kanday President Ferdinand Marcos Jr., First Lady Liza Araneta-Marcos kag anay Speaker Martin Romualdez kun siya mismo ang mapatay.
Ginpanginwala ni Duterte ang mga alegasyon, samtang ang amo man nga mga pahayag kabahin sang impeachment case batok sa iya nga yara pa sa Senado.
Nahibaluan nga nagdangop na ang Vice President sa Supreme Court agud nga ipa-untat ang iya kaso-kriminal.
Suno sa bise-presidente, indi dapat mapasakaan sang criminal case ang isa ka impeachable official samtang yara pa ini sa puwesto.
Sa 28 ka pahina nga petisyon, ginhingyo ni Duterte, paagi sa iya mga abogado nga ginapangunahan ni Atty. Paul Lawrence Lim, nga magpagwa ang Supreme Court sang temporary restraining order (TRO) batok sa proceedings kag i-nullify ang resolusyon sang Department of Justice (DOJ) nga nangin basehan sa pagpasaka sang kaso.#
