Ginpaguwa nanday Senate Minority Leader Alan Peter Cayetano kag Senator Pia Cayetano nga may mga pagpamahog sa mga judge sa impeachment trial ni Vice President Sara Duterte.
Sa ika-24 nga adlaw sang trial, ginpamangkot ni Pia Cayetano si retired Sandiganbayan Presiding Justice Amparo Cabotaje-Tang kon nakaeksperyensya na siya sang sitwasyon nga ang mga hukom ginapahog bangud sa ila propesyon.
Si Cabotaje-Tang nga nagretiro sang 2024 ang may 44 ka tuig nga eksperyensya sa pagdumala sang mga kaso nga may kaangtanan sa anti-corruption sa Supreme Court, Office of the Solicitor General kag Sandiganbayan.
Sabat sang retirado nga mahistrado, wala siya nakabaton sang amo nga pagpamahog may kaangtanan sa mga kaso nga pending sa Sandiganbayan.
“I’m happy for you kasi kami ho meron, sabat ni Senator Pia.
Antes sa senadora, ang iya utod nga si Senator Alan ang nagpamangkot kay Cabotaje-Tang kon mahimo siya makapagwa sang writ of amparo para sa mga senator-judge nga ginapatihan nga ginapahog. Ang pamangkot ni Cayetano ang may kaangtanan sa una nga pangalan ni Cabotaje-Tang nga “Amparo.”
Ang writ of amparo isa ka legal nga remedy nga available para sa mga tawo nga ang ila kinamatarong sa kabuhi, kahilwayan kag seguridad ang ginapahog ukon gina-violate.
Sa guwa naman sang impeachment court, nagdugang si Senator Alan nga obvious man nga ginahaboy ang pamahog batok sa opposition senators.
“Obvious naman, ‘di ba guys? I mean, obvious naman. You can see it with your eyes. When Senator Ping, as an example, says, dapat matapos ‘yung impeachment by December, then by December may kaso daw ako. The changing of the numbers. Sino ba kinakasuhan? ‘Yung nasa oposisyon,” suno sa minority leader.
“Alangan naman ang opposition mag-threaten sa kapwa opposition?,” dugang niya.#
