Tatlo ang napatay kag anum ang nasamaran sa pagpangluthang sa sulod sang Banga National High School sa Banga, South Cotabato sini nga Biyernes, Septyembre 18.
Ini ang ginkumpirmar ni South Cotabato Governor Reynald Tamayo.
Ini ang updated nga report halin sa nauna nga pahayag sang Department of Social Welfare and Development (DSWD) nga anum ang patay kag 17 ang pilason.
Una na nga ginpahayag sang Department of Education ukon DepEd nga natabo ang pagpaniro sa sulod sang campus.
Lakip sa napatay amo mismo ang suspek nga ginaalegar nagluthang man sa iya kaugalingon.
Suno sa DepEd, nagakoordinar ini sa Schools Division kag Regional Office, lokal nga mga otoridad kag law enforcement agencies agud ma-verify ang mga detalye sang insidente kag mahatag ang kinahanglanon nga bulig.
Ginpahayag sang ahensya nga prayoridad sini ang seguridad kag kaayuhan sang mga estudyante, manunudlo kag school personnel, kag handa ini nga maghatag sang psychological first aid kag mental health kag psychosocial support sa mga naapektuhan.
Nagpanawagan man ang DepEd sa publiko nga magpabilin nga kalmado kag indi magpalapta sang mga impormasyon nga wala pa na-verify samtang ginaiimbestigaran sang mga otoridad ang insidente.
Samtang, ginpangabay sang DepEd Region 12 ang publiko nga untatan ang pagpalapta sang mga video sang insidente agud respetuhon ang mga biktima kag ila mga pamilya, bangod mahimo ini magdugang sang trauma kag makalapas sa privacy sang mga biktima.
‘TRUE CRIME COMMUNITY’
Ginausisa sang mga otoridad ang impormasyon nga konektado sa online group nga may kaangtanan sa pagpamintas kag kasingki ang estudyante nga suspek sa pagpangluthang.
Suno kay Governor Reynaldo Tamayo, nakaistorya man sang mga otoridad ang suod nga abyan sang estudyante kag ginpahayag nga miyembro ini sang isa ka online group nga ginatawag “True Crime Community.”
“Ang inisyal lamang na aming nakita ay nakausap namin yung best friend ng bata. Itong bata pala ay miyembro ng True Crime Community. So ito ay iniimbestigahan pa rin ng ating kapulisan kung ano ba ito at ano ba nakapaloob [sa] internet community na ito,” suno kay Tamayo.
Ginpapauli naman ang mga estudyante agud mapakalma ang ila emosyon, samtang nanawagan si Tamayo sa mga ginikanan nga siguruhon nga indi madali nga ma-access sang mga kabataan ang mga armas.
Ginpasiguro man sang gobernador nga magahimo ang provincial government sang mga tikang agud malikawan kag mapunggan ang pagbalik sang amo sini nga insidente sang pagpangluthang.#
