Ginpasar sang Senado sa third kag final reading ang duha ka importante nga mga hagna nga nagatuyo nga maprotektahan ang mga kabataan batok sa online abuse kag exploitation, kag agud mahimo nga safe ang mga eskwelahan.
Sa session, gin-aprubahan ang Comprehensive School Safety Act kag SAGIP BATA Act matapos makakuha ang duha ka measures sang 17 affirmative votes, wala sang negative vote, kag wala man sang abstention.
Ang Senate Bill No. 2426 ukon Comprehensive School Safety Act nagatuyo nga ma-institutionalize ang sistema para malikawan, masabat, kag ma-recover ang mga kaso sang violence kag iban pa nga safety threats sa mga eskwelahan.
Gin-aprubahan ini matapos ang pila ka fatal school shooting incidents sa nagkalain-lain nga bahin sang pungsod, lakip ang pinakabag-o nga natabo tatlo lamang ka adlaw ang nagligad sa Banga, South Cotabato.
Suno kay Senator Bam Aquino, ang principal sponsor kag co-author sang bill, ang proposed framework may tatlo ka panguna nga bahin nga amo ang prevention, response, kag recovery.
“Very timely bill, considering that we also had another incident last week in South Cotabato. Importante ho ang batas na ito para mapigilan na ho natin at maging handa ang ating mga paaralan sa ganitong karahasan,” suno naman kay Senate President Sherwin Gatchalian sa plenary session.
Ang isa pa ka nga nakalusot na sa upper chamber amo ang Senate Bill No. 1819 ukon Safeguarding Against Grooming, Inducement and Predation, and Building Accountability for Technology-Facilitated Abuse or Exploitation ukon SAGIP BATA Act.
Kon mangin layi, ini ang magabulos sa Republic Act No. 11930 ukon Anti-Online Sexual Abuse or Exploitation of Children kag Anti-Child Sexual Abuse or Exploitation Materials Act.
Nagatukod ini sang mas mabakod nga preventive framework para maprotektahan ang mga kabataan batok sa grooming, exploitation kag manipulation sa physical kag digital platforms.
Ginatuyo man sang bill nga mapabakod ang child protection safeguards, regulatory protocols kag enforcement mechanisms batok sa technology-facilitated sexual abuse, paglapta sang child sexual abuse material kag pagplano sang seryoso nga mga krimen batok sa mga menor de edad.#
