Nagpaguwa sang joint statement ang Canada, Denmark, France, Germany, Italy, Japan, the Netherlands, kag the United Kingdom nga nagapamatok sa sanctions nga gin-anunsyo sang Estados Unidos sang Amerika batok sa International Criminal Court (ICC).
“As committed supporters of the ICC, we regret and strongly disagree with the announcement of sanctions to be imposed upon the Court by the United States,” suno sa statement nga gin-release Oktubre 9.
Nagpaandam man ang amo nga mga pungsod nga kun maimplementar na ang sanctions, maka-apekto ini sang daku sa operasyon sang korte amo man sa staff kag sa ila nga mga pamilya.
Ginpanindugan man sang walo ka mga pungsod ang ila suporta sa independensya sang ICC.
Ila man nga ginpasalig nga magatrabaho sila agud nga proteksyunan ang mandato sang amo nga korte sa The Hague kag matib-ong ang accountability ukon salabton sa seryoso nga mga international crime.
Nahibaluan nga ginsapubliko sang administrasyon ni US President Donald Trump ang mas masangkad nga sanctions batok sa ICC agud mapunggan ang ginakabig sini nga pagpanghilabot sa soberanya sang Estados Unidos sang Amerika.
Suno kay U.S. Secretary of State Marco Rubio, pagadumilian ang mga kompanya kag entities sang Amerika nga magpatigayon sang transaksiyon sa ICC.
Pahayag ni Rubio, indi magpasugot si Trump nga imbestigaran sang ICC ang mga Amerikano. Dugang sini: “Either the ICC will end its threats, or we will end the ICC.”
Ang pagpahibalo sang sanctions natabo pila lang ka oras matapos nga nakabaton si anay ICC judge Navi Pillay sang 2026 Nobel Peace Prize bangod sa iya mga panikasog nga mapasanyog ang kalinong kag international law.
Matandaan nga nadagdagan na anay sang sanctions sang Estados Unidos ang 17 ka hukom kag opisyal sang ICC, apang sa sini nga tikang, ang korte mismo ang gin-target agud mapaluya ang pinansyal nga kapasidad sini nga magpadayon sa operasyon.
Naghatag ang Estados Unidos sang anum ka bulan nga grace period antes ipatuman ang pila sa bag-o nga sanctions, gani mahimo gihapon nga magpadayon ang mga miyembro nga pungsod sa paghatag sang pondo para sa operasyon sang korte.#
