Ipatuman sang Iloilo City Police Office (ICPO) ang hugot nga seguridad sa siyudad sang Iloilo para sa pag-obserbar sang nagahilapit nga All Saints’ Day kag All Souls’ Day.
Suno kay PLtCol. Jereme Belo, Deputy City Director for Operations sang ICPO, sakop sang ila security plan ang 19 ka patyo sa siyudad, lakip ang publiko kag pribado nga mga patyo.
Pahayag niya, halin Oktubre 29 tubtob Nobyembre 2, magapahamtang na sang police visibility, traffic personnel kag police assistance sa mga pampubliko nga lugar, lakip ang tatlo ka pantalan kag pito ka transport terminal, agud masiguro ang kaluwasan sang publiko.
Ginpahayag pa nga ipatuman man sang ICPO ang Executive Order No. 103, Series of 2026, nga gin-isyu ni Iloilo City Mayor RaisaTreñas.
Lakip sa ordinansa ang pagdumili sa pagdala sang mga gamit pareho sang, armas, medium ukon large-sized nga mga speaker, gamit sa sugal, pag-overnight sa mga patyo kag paghaboy sang basura, amo man strikto nga pagpatuman sang no-smoking ordinance.
Ginapanugyan man sang ICPO sa publiko nga likawan ang pagdala sang daku nga kantidad sang kwarta kag pagpakita sang mga malahalon nga kagamitan pareho sang alahas.
Dugang pa nga ginapahanumdom sang mga otoridad ang mga ginikanan nga bantayan sang maayo ang ila mga kabataan kag siguruhon nga nasiraduhan ang ila mga balay antes ini bayaan.
Ginalauman nga linibo ka Ilonggo ang magabisita sa mga sementeryo kag memorial park sa siyudad para sa pagdumdom sa ila mga pinalangga nga napatay.
