Nagapanawagan ang lider sang Paghugpong sang mga Mangunguma sa Panay kag Guimaras ukon PAMANGGAS nga si Lucia Capaducio nga untaton anay ang pag-import sang bugas.
Ini bangud mahimo ini makaapekto sa presyo sang humay ilabi na nga nagapadulong na ang tag-alani.
Sa interview sang Bombo Radyo kay Capaducio, iya ginpahayag nga may mga mangunguma na nga nakaani, apang limitado lamang ang ila nakuha nga ani.
Suno kay Capaducio, ang iban nga mangunguma napilitan nga magsab-og liwat sang ila pananom bangud naapektuhan ini sang El Niño.
Dugang pa niya, kun magpadayon ang pag-abot sang imported nga bugas sa amo man nga tion, posible nga magnubo ang presyo sang humay nga ginabaligya sang mga lokal nga mangunguma.
Pahayag pa ni Capaducio nga indi lamang bugas ang ginapa-import kundi pati ang iban nga produkto kaangay sang isda kag baboy, nga mahimo man makaapekto sa pangabuhian sang lokal nga mga producer.
Gindugang niya nga sang nagligad nga tuig, tuman ka nubo ang presyo sang humay, kag may posibilidad nga liwat ini matabo sa masunod nga pila ka semana kun magapadayon ang importasyon sang bugas samtang nagasulod na ang bag-o nga ani.
Bangud sini, nagapanawagan ang PAMANGGAS nga hatagan sang konsiderasyon ang kahimtangan sang lokal nga mga mangunguma agud maprotektahan ang presyo sang ila produkto kag ang ila pangabuhian.
