Verbal agreement lamang sa tunga sang Iloilo City Police Office (ICPO) kag Iloilo City Traffic and Transportation Management Office (ICTTMO) ang basehan sang pagpahanugot sa mga patrol vehicle sang kapulisan nga magliko sa pedestrian lane sa General Luna Street, Iloilo City, sa ila pagpasulod kag paggwa sa opisina.
Sa interview sang Bombo Radyo kay ICTTMO Head Retired Colonel Uldarico Garbanzos, iya ginklaro nga ginhatag ang amo nga permiso bangud sa operational activities sang ICPO, ilabi na sa paglihok sang mga patrol vehicle sa ila headquarters, apang wala sang executive order ukon city ordinance nga nagatugot sini.
Suno kay Garbanzos, ang ICPO mismo ang nag-request sang amo nga arrangement, nga ginakonsiderar ang ila operational needs kag ang U-turn slot sa General Luna Street.
Gin-athag man niya nga sa nasambit lamang nga dalan ginapasugtan ang mga patrol vehicle nga magliko, samtang indi ini nagakahulugan nga may kinamatarong na ang mga ini nga maglapas sa traffic regulations sa iban nga dalan.
Gindugang pa ni Garbanzos nga dapat mangin modelo sang mga motorista ang kapulisan sa pagsunod sa traffic rules, gani gin-remind man sini ang ICPO nga dapat may traffic signage sa lugar, bangud may yara na sini sang una.
Samtang, kung makadisgrasya ang patrol vehicle, ang driver ang posible nga magpanabat, depende sa resulta sang imbestigasyon kag sa mapamatud-an nga paglapas.
Posible man nga mag-atubang ini sang civil ukon criminal liability kung may nagakaigo nga basehan, dugang pa sa internal investigation sang ICPO.
𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
