Pasakaan sang kaso nga double murder kag attempted murder ang suspek sa pagpangluthang kagina sang kaagahon sa Barangay Sto. Rosario-Duran City Proper.
Sa interview sang Bombo Radyo kay Police Captain Melchor Tolentino ang Chief of Police sa ICPS 1, iya ginpahayag nga tubtob subong wala sa gihapon na recover ang armas nga gingamit sang suspek, tungod sa pahayag sang suspek ginhaboy niya ini sa kahilamunan apang sang ginkadtuan sang katapo sang kapulisan ang lugar, wala sang nakita nga armas.
Gindugang ni Tolentino nga ginpangita man ang armas sa isa ka abandonado nga balay kung diin na aresto ang suspek, apang wala man narecover didto ang nasambit nga armas.
Suno kay Captain Tolentino padayon ang pag proseso sang papeles agud mapasakaan sang double murder kag attempted murder ang suspek.
Ginpahayag ni Tolentino nga base sa imbistigasyon, nag pauli ang suspek sa iya balay matapos mahimo ang krimen kag halin sa iya balay, nag labay ini sa isa ka lulutsan kag nag kadto sa abandonado nga balay nga ginapanag iyahan man sang abyan sang suspek.
May nag bulig sa kapulisan kag nag sugid nga nakita nila nga didto nag sulod ang suspek kag wala na maka gwa gani nga gilayon man ini nga na aresto.
Ginpahayag man ni Tolentino, nga base man sa ila imbistigasyon, gin agda sang isa sa mga biktima ang supek nga mag inom antes matabo ang insidente kag gin baton man ini sang supek kag gin ubos inom ang isa ka butilya kag nag deretso pauli, nag lakat man ang biktima nga si Conrad agud mag kadto sa kalapit nga salakyan agud mangihi, digto kag nag balik ang suspek kag malapitan nga gin tiro ang una nga biktima.
Matapos matumba si Conrad, gilayon nga gin tiro sang suspek ang ikaduha nga biktima nga may distansya sang halos 10 meters halin sa gina tindugan niya.
Sang natumba na si Lito nga amo ang ikaduha nga biktima, nag tiro pagid ang suspek sa isa ka persona apang wala ini maigo.
Ginpahayag ni Tolentino nga base naman sa panaysayon sang suspek, pasado alas dos sang kaagahon kaina sang aga, nag gwa kuno ini sya agud sugaton ang iya bata kag sang papuli na ini, nakita niya nga gina sundan sya sang duha ka indibidwal gani pag abot sa iya puluy-an, gin kuha niya ang iya armas kag gintiro ang mga nagasunod saiya.
Apang gin dugang man ni Tolentino nga ang panaysayon sang suspek ang wala naga santo sa ila imbistigasyon gani dako ang posibilidad nga naga butig ini.
Sa subong ginpaidalom na sa medical ang suspek sang krimen.
Text by: Bombo Ireca Pioquinto
