Magapasundayag liwat sa beauty pageant stage ang Filipina beauty queen nga si Michelle Dee!
Subong nga adlaw, Oktubre 26, opisyal nga ginkumpirma sang Miss Grand International (MGI) All Stars nga nalakip si Michelle sa mga kandidata nga maga-compete sa event nga patigayunon sa Disyembre.
Mismo ang aktres ang naghatag man sang kumpirmasyon kag nagpasalamat sang tanan nga suporta nga iya nabaton halin sang 2023.
“Back in 2023, I’m so grateful because even though I did not take home the crown, you accepted me like a winner. But I feel like we still have a lot left in the tank,” pahayag sini.
Nag-post man ini sang Instagram Reel nga may hashtags nga #DeePaTapos kag#WMMMO ukon “Walang mag-mo-move on.”
Matandaan nga ginkoronahan si Michelle nga Miss Universe Philippines sang 2023; kag sang gintiglawas na sini ang Pilipinas sa international stage, nagdaog ini sang pila ka special awards kag nagtapos sa Top 10.
Naka-compete man siya anay sa Miss World sang 2019 kag nagtapos sa Top 12.
Subong nga tuig ginpatigayon ang una nga edisyon sang MGI All Stars kun sa diin ginkoronahan bilang winner si Vanessa Pulgarin sang Colombia.
Sa second edition, mangin kaupod ni Michelle ang iban pa nga mga Pinay nga amo sanday Alexie Brooks kag Anne Patricia Diaz.
