Nagahingyo sang temporary exemption ang mga transport cooperatives sa Western Visayas angot sa gin-aprubahan nga P40 tubtob P45 nga saka sa daily minimum wage.
Suno kay Western Visayas Transport Cooperative (WVTC) president Raymundo “Boyet” Parcon, posible nga mameirdehan sila sa dugang nga labor cost ilabi na nga padayon man ang pagsaka sang presyo sang gatong, magluwas pa sa ila mga obligasyon sa pagbayad sang utang sang kooperatiba sa bangko.
Pahayag ni Parcon, ila istoryahan ang posible pag-file sang petisyon sa Regional Tripartite Wages and Productivity Board (RTWPB) para i-exempt sila.
Nahibaluan nga ang WVTC may ara sang masobra ka 380 personnel, lakip diri ang mga drivers, passenger assistance officers (PAOs), kag iban pa nga opisyales sang kooperatiba.
Nahibaluan nga ginpasa na sang RTWPB ang Wage Order No. RBVI-30 sa National Wages and Productivity Commission (NWPC) sang Oktubre 21 para ipaidalom sa review kag reaffirmation.
Sa karun, padayon nga gina-engganyo ni Parcon ang iban pa nga mga transport cooperatives kag korporasyon sa Western Visayas nga magpasa sang kaangay man nga petisyon agud mabuligan sila nga makabangon sa pinansyal nga kabudlayan.
