Ginkuwestiyon sang isa ka budget watchdog ang kapin P1 trillion nga balor sang ginapatihan nga budget insertions sa bersyon sang 2027 national budget nga gin-aprubahan sang Kamara.
Suno kay People’s Budget Coalition (PBC) representative Kenneth Isaiah Abante, lakip diri ang 7,000 ka infrastructure projects nga may kabug-usan nga pondo nga P190 billion.
Sa hearing sang Senate committee on finance, ginpahayag ni Abante nga madamo nga infrastructure projects ang gindugangan sang pondo bisan kulang ang detalye parte sa mga ini.
“The lawmakers padded numerous infrastructure projects without any details. In the House version, they augmented by P43 billion the multipurpose buildings in the budget of the DPWH (Department of Public Works and Highways), which also included access roads and bridges to basic infrastructure program,” pahayag sini sa Senate committee on finance, Oktubre 26.
Suno pa kay Abante, nadugangan man sang tag-P24 billion ang pondo para sa Assistance to Individuals in Crisis Situations ukon AICS sang Department of Social Welfare and Development kag Medical Assistance to Indigent and Financially Incapacitated Patients ukon MAIFIP sang Department of Health.
May separado man nga P10 bilyon nga gin-alokar para sa Presidential Assistance to Farmers and Fisherfolk ukon PAFF.
Suno kay Abante, ang mga kuwestiyonable nga alokasyon nagresulta sa pagbuhin sang pondo para sa importante nga mga programa sa edukasyon, transportasyon, ikaayong lawas kag pagpanghanda sa mga kalamidad.
“They made a substantial reduction in foreign-assisted projects, about P27 billion in the Laguna Lakeshore Road, nearly P20 billion in the Metro Manila Subway, a P15-billion cut in the budget for the North-South Commuter Rail project and P10-billion cut in pension and gratuity,” pahayag pa sini.
Ang pinakamabug-at nga iya ginkuwestiyon amo ang pagbuhin sang P7.75 billion sa pondo sang National Disaster Risk Reduction and Management Council. Suno sa iya, indi dapat pag-unahon ang mga multipurpose building nga indi man ginakabig nga gilayon nga kinahanglanon sang publiko.
Nahibaluan nga gin-imbitar sang Senate Committee on Finance ang PBC kag 27 pa ka civil society organizations (CSOs) kag government watchdogs agud ipresentar ang ila mga pag-usisa kag proposal kaangot sa ginaduso nga national budget sa 2027.
Suno kay Committee on Finance Chairperson Senator Joseph Victor G. Ejercito, katuyuan sang isa ka adlaw nga konsultasyon nga malakip ang partisipasyon sang mga CSO sa proseso sang paghimo sang national budget.#
