Gin-aprubahan sang Kamara sa ikatatlo kag katapusan nga pagbasa ang hagna nga ginduso agud nga protektahan ang mga kabataan batok sa peligro sa social media kag online gaming platforms.
Nakakuha ang House Bill 11566 ukon Safe and Friendly Environment for Kids in Digital Spaces (Safe Acts) Act sang 288 ka boto nga nagapabor, tatlo ka boto nga nagapamatok, kag wala sang abstentions.
Sa idalom sang hagna, indi pagtugutan ang mga kabataan nga wala pa naga-edad 13 anyos nga maghimo, magmintinar, ukon maggamit sang account sa social media kag iban pa nga sakop nga digital platforms.
Ang mga naga-edad naman sang 13 tubtob 18 anyos mahimo makagamit sini, apang may mga limitasyon batok sa makahalalit nga content, indi kinahanglanon nga pagkolekta ukon pagpaambit sang personal nga impormasyon, behavioral profiling, online purchases, kag mga mekanismo nga kaangay sang sugal.
Obligado man ang mga social media kag online gaming platforms nga maghimo sang Child Safety Risk Assessment kag magpatuman sang mga tikang agud ma-address ang makahalalit nga content kag mga feature nga may mataas nga risgo sa mga kabataan.
Ginaduso man ang pagtukod sang Office for Children’s Social Media and Digital Safety sa idalom sang Department of Information and Communications Technology (DICT) agud mag-monitor sang pagsunod sa mga regulasyon, maghimo sang teknikal nga pagpangusisa kag pauna nga imbestigasyon, kag makig-angot sa concerned government agencies.
Sa pihak nga bahin, ang National Telecommunications Commission (NTC) ang magapatuman sang mga administratibo nga tikang. Ang mga internet service provider kinahanglan magkooperar sa legal nga mga mando kag pangabay nga may kaangtanan sa pagpreserbar sang datos kag pag-block ukon pag-limit sang access suno sa nagapatuman nga mga layi kag judicial safeguards.
Sang nagligad nga semana, matandaan nga gin-aprubahan man sang Senado ang isa ka hagna nga nagatuyo nga limitahan ang paggamit sang social media sang mga menor de edad.
Ini nga mga tikang ang kasunod sang kabalaka kaangot sa ginapahayag nga pagpang-groom sang mga menor de edad paagi sa social media, lakip ang mga kaso nga may kaangtanan sa kasingki kaangay sang pagpangluthang sa mga eskwelahan.#
