Ginsuspinde sang Bureau of Internal Revenue (BIR) ang requirement nga pagpakita sang QR-coded tax registration badge sa mga website kag social media page sang online sellers, freelancers, content creators, kag iban pa nga negosyo.
Gin-anunsyo ni BIR Commissioner Charlito Martin Mendoza nga ‘suspended indefinitely’ ang amo nga requirement lima ka adlaw antes sang orihinal nga deadline sa Oktubre 31.
Suno sa BIR, wala sang ipatuman nga penalty sa mga indi makapakita sang badge samtang yara sa suspension ang requirement.
Ang mga may ara na sini mahimo gihapon magpadayon sa pagpakita sini kun gusto nila.
Matandaan nga ginpatuman ang requirement sang Abril bilang alternatibo sa pagpakita sang bug-os nga Certificate of Registration (COR) sang BIR sa internet.
Paagi sa QR code, mahimo ma-verify sang mga customer kon rehistrado sa BIR ang online seller ukon service provider.
Nag-ugat naman ang kontrobersiya bangud sang posibilidad nga ma-expose ang personal nga impormasyon paagi sa QR code. Nag-atubang man sang teknikal nga problema ang implementasyon, lakip na ang pagpangduha-duha kun sin-o gid ang kinahanglan magsunod sa requirement.#
