Nagapati ang isa ka barangay official sang Ingore La Paz nga apisar may bayad ang pag-agi sa tatay pakadto sa barangay Ticud, daku sa gihapon ang bulig sini sa mga pumuluyo.
Ang taytay ang nakakonektar sa barangay Ticud kag barangay Ingore sa distrito sang La Paz nga ginatunga sang suba.
Sa interview sang Bombo Radyo kay Kagawad Lea Hortillosa, iya ginpahayag nga madugay na kag pila ka dekada ang nasambit nga taytay.
Suno sa iya, normal lang nga magpabayad ang tag-iya sang taytay nga human sa kawayan bangud ila man nga inisyatibo ang pagpa-ubra kag ila personal nga gasto lakip na ang gasto sa pagmaintenance sang taytay.
Ginpaathag man sang kagawad nga wala man ginapilit ang mga pumuluyo nga maglabay kag maggamit sang taytay.
Ginpahayag pa niya nga kun indi maggamit sang taytay ang mga pumuluyo, mabasa gid sila bangud sa suba gid ang mga ini magi agud nga makatabok.
Dugang pa ni Kagawad Hortillosa, wala man sila sang nabaton nga reklamo halin sa mga pumuluyo nahanungod sa lima ka piso nga bayad bangud nga mas mahapos kag convenient para sa ila ang paggamit sang taytay.
