Ginatinguhaan sang Simbahang Katolika nga ibalik ang matuod nga kahulugan sang Halloween paagi sa pagpalapnag sang mga aktibidad nga nagapasanyog sang pagkabalaan, sa baylo sang mga aktibidad nga nagasuksok ang mga kabataan sang costume nga nagarepresentar sang malain nga mga espiritu.
Sa interview sang Bombo Radyo kay Rev. Fr. Lester Villa, chief exorcist sang Ministry of Exorcism of the Archdiocese of Jaro, iya ginpahayag nga gina-discourage sang Simbahan ang pagsuksok sang mga costume nga nagapakita sang mga makahaladlok nga tinuga pareho sang aswang, White Lady kag iban pa nga ginakabig nga malain nga espiritu.
Pagpaathag niya, sa baylo nga magsuksok sang makahaladlok nga mga costume, gina-engganyo niya ang pagpatigayon sang Parade of Saints kun sa diin ang mga kabataan ang naka-costume bilang mga santos.
Bangud, suno kay Fr. Villa, ang pagsuksok sang makahaladlok nga costume ang mahimo maghatag sang “opening” ukon kahigayunan para sa mga yawa nga makasulod sa isa ka tawo.
Dugang pa niya , iya ginapahanumdom nga dapat gamiton ang Halloween sa pagtudlo sa mga kabataan sang kaayuhan kag pagkabalaan agud mas mahangpan sang mga ini ang kinalain sang maayo kag malain.
